Umlobi nguSinenhlanhla Moyo
Owesifazane oleminyaka engu-44 ubudala, uSithokozile Mangauzani ovela eNyandeni, eMatabeleland South, usecele uncedo kubantu abalothando, amabhizimusi kanye lenhlanganiso ezitshiyeneyo ukuze indodakazi yakhe eleminyaka engu-14 iqhubeke ngemfundo eLobengula High School, njengoba ubunzima bezomnotho sebubeke ikusasa layo engcupheni.
Umfundi lo, oseForm One, uthi iphupho lakhe yikuba ngudokotela wabesifazane (gynaecologist) ukuze ancede abesifazane njalo asindise impilo zabantu.
Lanxa umndeni wakhe ubhekane lobunzima obukhulu, uthi uzimisele ukuqhubeka efunda ukuze afeze iphupho lakhe.
On this topic
UMangauzani uthe lanxa wakwazi ukuthola imali yokubhalisa indodakazi yakhe ekuqaleni komnyaka, usehlulekile ukuqhubeka ekhokha imali yesikolo kanye lezinye indleko zemfundo ngenxa yokungasebenzi.
“Ngakwenelisa ukuthi ingene esikolo ekuqaleni komnyaka, kodwa kusukela lapho sengihlulekile ukuhambisa imali yesikolo kanye lezinye izinto ezifunakalayo ngoba kangisebenzi. Kwezinye izikhathi angisakwazi ukuthi imali yokubhadala okulandelayo izavela ngaphi,” kutsho uMangauzani.
Imuli kaMangauzani idinga ukukhokha i-US$100 yemali yesikolo ngethemu, ngaphandle kwezinye izidingo ezigoqela i-blazer ebiza i-US$30, i-tracksuit ye-US$35, izicathulo zemidlalo ezibiza i-US$10, ijezi lesikolo le-US$10, kanye lamabhuku okufunda lezinye impahla ezidingakalayo.
UMangauzani uveze ukuthi indodakazi yakhe yafunda eSwazi Primary School kusukela kuGrade Four kusiya kuGrade Seven ihlala kudadewabo omncane. Kodwa ngesikhathi sokungena ehigh school, umndeni wanquma ukuyiletha eBulawayo ngenxa yokuthi isikolo esiseduze lalikhatshana kakhulu njalo indlela yayingaphephanga kumntwana oyinkazana.
“Kusukela kuGrade Four kusiya kuGrade Seven wayehlala lodadewethu omncane. Kodwa ngesikhathi sokungena ehigh school sabona kungcono ukuthi ahlale lami koBulawayo ngoba isikolo esasizaya sasikhatshana kakhulu kumntwana oyinkazana. Khathesi usehlala lami kodwa sengihluleka ukumsekela ngakho konke akudingayo esikolo,” kutsho yena.
Lanxa impilo inzima, umfundi lo uthi kasoze alahle ithemba ngoba ubona imfundo iyiyo kuphela indlela engaguqula ikusasa lakhe.
“Ngifisa ukuba ngudokotela wabesifazane ngelinye ilanga ukuze ngincede abesifazane njalo ngisindise impilo zabantu. Imfundo yiyo kuphela ithemba engilalo lekusasa elingcono,” kutsho umfundi lo.
UMangauzani usecele abantu abalothando, amalunga omphakathi, amabhizimusi kanye lenhlanganiso ezitshiyeneyo ukuthi bamphathise ukuze indodakazi yakhe iqhubeke ngemfundo.
“Angifuni ukuthi umntanami alahlekelwe yikusasa lakhe ngenxa yobuyanga. Loba yiluphi uncedo, lanxa luncane kangakanani, lungamnceda ukuthi aqhubeke esikolo njalo afeze amaphupho akhe,” kutsho yena.
Abafisa ukuphathisa bangaxhumana loSithokozile Mangauzani ku 078 587 3554.
Leave a Reply