Izakhamizi zeNyandeni zikhalaza ngezikolo ezikhatshana

Indaba ilotshwe ngu Charity Mthunzi

Izakhamizi zase Nyandeni ku Ward 4, village 6 zikhalazala imango emide ehanjwa ngabantwana besiya esikolo.

Izakhamizi lezi zithi abanye abantwana bahamba ngendlela ezedlula egangeni, ezilengozi zabo bhinya, kuthi abanye lapha abahlala khona kuphetsheya komfula ngakho nxa izulu linile, kubanzima ukuthi bacaphe.

Intatheli ye CITE, ixoxe lo Sithabisiwe Sibanda, umzali olomntwana ofunda esikolo se Nyandeni.

USibanda uthe abazali bayabe bengahlalisekanga nxa abantwana behamba bodwa esikolo ngendlela equma egangeni.

“Kuyahlukumeza kakhulu ukuba izikolo zibe khatshana. Kwesinye isikhathi siyake sizwe ukuthi kulo bhinya olindela abantwana egangeni. Kuyabe sokumele siphelekezele abantwana siphinde sibalande ukuze sibe lesiqiniseko sokuthi abahlaselwa.”

Omunye umzali uSithabile Nkala uthi bahlala phetsheya komfula ngakho nxa umfula ugcwele abantwana bayaphutha izifundo.

“Nxa izulu linile kuba nzima ukuthi sicaphise abantwana umfula. Ngakho bacina bengahambi esikolo. Lokhu kuyaba phambanisa ezifundweni zabo bacine bengasaphumelelanga kuhle emhlolisweni. Siyafisa ukuthi ngabe siyathola izikolo eduze lasemakhaya ethu ukuze abantwana bafunde kuhle.”

Ukhansila ka Ward 4 uNokuthula Sibanda, uvumelane lembono yabazali ukuthi kwakhiwe izikolo eduze.

“Izikhalazo zabazali siyazizwa njalo imibono lezicelo zabo ukuthi izikolo zakhiwe eduze zamukelekile. Le ngeminye yezinqumo esilazo ukuthuthukisa isigaba. Silethemba ukuthi sizakufeza lokhu.”