Umfana osakhulayo ugalula edamu eNyandeni ebhukutsha

Umlobi ngu Charity Mthunzi 

Izakhamizi ze Nyandeni eGwanda ku Village 6, Ward 4, zithithibele ngemva kokuba umfana osakhulayo egalule edamu ebhukutsha labangane bakhe.

Umfana lo ubeleminyaka elitshumi lane yokuzalwa. 

Isehlakalo lesi senzakale ngolwesithathu ngehola lika 12 emini.

Umlobi uxoxisane lo Mongiwethu Moyo omunye wezakhamizi onguye ochasise kabanzi ngomonakalo lo.

“Sithithibele kakhulu ngesehlakalo esisiveleleyo esigabeni siswele lokuthi sibambe ngaphi. Umfana uwele edamu ngehola letshumi lambili emini, lapho akade ebhukutsha labanye bakhe. Sizamile ngazo zonke indlela ukuthi simdinge emanzini. Siqale sisehluleka, kodwa ngehola lesihlanu emini yantambama senelisile ukumkhipha kodwa esesitshiyile emhlabeni,” uMoyo uchasisile.

Umkhokheli wesigaba sika village 6 u Shepherd Moyo ugcizelele ngokuthi abazali baxwayise abantwana bengabhukutshi emadamu ngoba kuyi ngozi. 

“Asikhuthazeni abantwabethu njenge zakhamizi badlalele khatshana kwamanzi ukuze sivikeleke ezingozini zamanzi.”

Abomthetho abalande umzimba kamufi labo baxwayise kabanzi ukuba abantwana bangadlaleli emanzini ngoba kuyingozi.

Isikhulumeli samapholisa ezansi yema Ndebeleni uAssistant Inspector Stanford Mguni ubike ukuba bawutholile umbiko wesehlakalo lesi.

“Sitholile umbiko wokuba kulomfana obedlala labangane bakhe edamu eNyandeni. Bathe ngemva kokuqeda ukugeza baqala ukubhukutsha. Omunye wabo wagalula, bazama ukumsiza kodwa behluleka. Bagijime babiza abadala abayibo abafike benelisa ukumkhupha emanzini,” uAsst Insp Mguni.

This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.