Umlobi ngu Similo Sithole
Intsha yesigabeni sika ward 7, eSitezi isikhalaze ngokuswelakala kwamagagasi ocingo esigabeni sabo osekubangele ukuthi bekhuthe amathuba emisebenzi atholakala ngokungena emoyeni kubomakhala ekhukhwini.
Ngesikhathi abantu abaphila kuso, umakhala ekhukhwini useqakatheke kakhulu ngoba exhumanisa abantu, abantwana besikolo labo sebefunda ngaye umakhala ekhukwini obancedisa ukuthi bebone izifundo abazifundayo kumbe bethaphe ulwazi abangaluzwisisiyo ebulenjini.
Omunye wentsha esigabeni, uNtokozo Dliwayo ubike ukuthi udubo lokuswelakala kwamagagsi ocingo lwenza kubenzima ukuxhumana labanye abantu kwezinye indawo.
On this topic
“Kwesinye isikhathi siyafikelwa luhlupho kumbe abadala emakhaya befikelwe ludubo oludinga ukuthi bexhumane labanye abantu mhlawumbe phandle kwelizwe kumbe abatshayeli bezimota ikakhulu ngesikhathi lapho kulomkhuhlane kodwa uthole ukuthi kuba nzima ngenxa yo dubo lwe network.”
USithembelenkosini Sibanda yena ubike ukuthi intsha yesigabeni iyakhutha amathuba emisebenzi efana lowokuba ngababalisi kumbe ngomongikazi.
“Imisebenzi eminengi isifakwa khona ebulenjini, thina njengentsha yeSitezi siyawakhutha amathuba anjalo ngoba sibhekane lodubo lokuswelakala kwamagagasi. Kwesinye isikhathi ubulembu bubakhona uthi uyangena kumakhal’ekhukhwini uthole ukuthi isikhathi sokuthi ubhalise siyabe sesidlulile.”
USibanda ubuye wagcizelela ukuthi ukubakhona kwamagagasi kubenza labo behlakaniphe njengentsha yemakhaya.
“Kunje lathi masingena kubo WhatsApp kumbe Facebook kusenza lathi sihlakaniphe sibe kwazi ukuxhumana labanye abantu kwamanye amazwe lokhu kusenza lathi sivuleke ingqondo.
Intsha yesigabeni lesi igcizelele ngokuthi bengathola ibooster udubo lwabo lungaba nganeno ngoba inengi labo sebelabo omakhal’ekhukhwini.
Leave a Reply