Umlobi ngu Nancy Phiri
Izakhamizi zeStanmore zikhala ngokusilela kwesikolo sabantwana abancane (ECD) esiseduze.
Bathi abantwana bahamba umango omude kakhulu besiya eStanmore Primary School.
USobhuku uMillion Dube, uveze ukukhathazeka okukhulu ngaloludaba esithi: “Bayadlwengulwa abantwana kumbe belahleke endleleni becine besiya kweyinye indawo bona kumele beye emakhaya. Abantwana bayethuselwa njalo ngabantu becine bengasakwazi ukuthi baqonde ngaphi.”
UDube uthe njengabakhokheli esigabeni bazahlala phansi bebelomhlangano.
“Sizathi sesenza umhlangano wabantu bonke okugoqela labazali abalabantwana abaku ECD. Kungcono ukuthi bakhelwe indawo eseduze lemakhaya, kube lababalisi abazafundisa abantwana abazabhadalwa yibo abazali.”
Okhokhela isikolo esigabeni seStanmore oku School Development Committee ongathandanga ukuthi sifake ibizo lakhe ngendaba yokuvikela umsebenzi wakhe uthe abantwana abahlala e Peaceline, eMlampi, eZwiyo yibo abahamba umango omude kakhulu engaba ngama khilomitha amahlanu besiya ezikolo.
“Abantwana akumelanga behambe umango omude besiya ezikolo ngoba bafika sebediniwe, bengasalaleli lutho nxa ababalisi befundisa, kwenza njalo lokuthi abantwana bazonde isikolo.”
Ubike ukuthi abantwana bayadlwengulwa endleleni .
“Bakhona ababalisi abafundela ukufundiswa abantwana abancane ngakho kungatholakala indawo yokuthi bafundele kungabangcono kakhulu ngoba labo abantwana bazafunda bechelesile njalo besizwa lokho abakufundayo.”
Omunye wezakhamizi ubike ukuthi nxa izulu linile izifula ziyagcwala abantwana abancane bayadlalela emfuleni.
“Kwezinye izikhathi abantwana bayabizana bedlalele emanzini ngoba bengazi lutho bayagalula bafe.”
Uphinde wagcizelela wathi, “ sicela ukuthi abantwana bethole indawo lapho abazafundela khona ukuze bangangeni engozini zokudlwengulwa ngabantu lokufela emanzini.”
Esinye isakhamizi se Dema sithe kwesinye isikhathi abazali baletha abantwana e Stanmore Primary School baphinde bayebathatha.
“Siyacela ukuthi bakhelwe indawo yabo eduze lemakhaya ukuze befunde kuhle ngoba isikolo bayasithanda sibili kodwa ukuhamba umango omude kuyabalimaza kakhulu, kuba yingozi ngoba bayadlwengulwa becine sebengasafundi kuhle njalo le Mpilo yabo iyabe ingasekhonhle, umntwana uyabe engasakhululeki empilweni yakhe.”
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.