Enyandeni Primary School itshintsha i-uniform ngemva kweminyaka engaphezu kwe-40

Umlobi nguSimelokuhle Nyathi

Enyandeni Primary School eGwanda North, kuWard 4, isithathe isinqumo sokutshintsha i-uniform yesikolo ngemva kokusebenzisa efanayo okweminyaka engaphezu kwamatshumi amane.

I-uniform ebisetshenziswa kusukela isikolo savulwa ngomnyaka ka-1983 ayikaze itshintshwe, kodwa abaphathi besikolo, abalisi kanye leSchool Development Committee (SDC) bathi isikhathi sesifikile sokuthi isikolo sihambisane lezikhathi njengoba ezinye izikolo eziseduze sezivele zatshintsha ezazo.

Ilunga leSDC, unkosikazi Angela Dube, uthe isinqumo lesi sathathwa ngemva kokubonisana labazali emhlanganweni wesikolo.

“Umphathisikolo lababalisi babiza umhlangano lapho okwaxoxiswana khona labazali ngokutshintshwa kwe-uniform. Wonke umuntu wavumelana lesiphakamiso ngoba i-uniform yethu ibisindala kakhulu. Yiyo esasiyigqoka sisafunda, yaphinda yagqokwa ngabantwabethu, khathesi isigqokwa ngabazukulu bethu. Lokho kwatshengisa ukuthi sekuyisikhathi sokwenza inguquko,” kutsho uDube.

Uthe i-uniform entsha izanceda abafundi ukuthi bagqoke ngendlela ehambelana lezikhathi, ikakhulu ngesikhathi somqando.

“I-uniform entsha isilezingubo zomqando kanye lezasehlobo. Kudal besingelayo i-uniform yo mqando, okwakwenza abafundi bagqoke amabhulugwe loba ezinye izigqoko ezazingahambelani le-uniform yesikolo. Inhloso yethu yikuthi ekupheleni komnyaka ka2027 wonke umfundi abe eseyitholile i-uniform entsha. Lokhu kuyingxenye yemithetho yesikolo futhi abafundi bazakhangelelwa ukuyilandela,” kutsho uDube.

Omunye umzali, uMemory Dube, uthe uyaseseka isinqumo lesi ngoba sizaphakamisa isithunzi sesikolo.

“Kuhle ukuthi sitshintshe i-uniform ngoba ibisindala kakhulu. Lokhu kutshengisa ukuthi umphakathi usebenzisana lesikolo ekuthuthukiseni imfundo yabantwana bethu. Siyethemba ukuthi ngomnyaka ozayo abazali abanengi bazabe sebenelise ukuthengela abantwababo ama-uniform amatsha.”

Elinye ilunga leSDC uJoseph Guswane, uthe i-uniform endala ibisiyingxenye yomlando wesikolo kodwa isikhathi sesifikile sokuyitshintsha.

“Le yi-uniform esaqalisa ukuyigqoka sisafunda lapha isikolo sisakhiwa, njalo yaqhubeka isetshenziswa kusukela savulwa ngo-1983 kuze kube namuhla. Kodwa sibone kufanele ukuthi siyitshintshile ukuze ihambelane lezikhathi. Izikolo ezingomakhelwane ezifana leStarnmore kanye leShake sezivele zatshintsha ama-uniform azo, lathi besingafuni ukusala emuva,” kutsho u Guswane.

“Ngaphezu kwalokho, le yi-uniform yagqokwa yithi, yagqokwa ngabantwabethu, khathesi isigqokwa ngabazukulu bethu. Yikho sibone kufanele ukuthi isikolo sibe le-uniform entsha ezabonakalisa intuthuko lesithunzi sesikolo.”

Abaphathi besikolo bathi ukutshintshwa kwe-uniform kuyingxenye yemizamo yokwenza isikolo sihambisane lezikhathi kanye lokuqinisa isithunzi saso emphakathini.