Umlobi ngu Gracious Mbangeni
Intsha yeSitezi, eGwanda, ku Ward 7 icela ukuncediswa ukuthi bathole imisebenzi yezandla ukuze baziphilise kunye lemuli zabo.
Abatsha laba bachasise ukuthi ukuswelakal kwemisebenzi lokungabi khona kwendlela zokuziphilisa sokwenze ukuthi bayeyiseke esigabeni.
Balandise ukuthi lokuphatheka enhlelweni lasemhlanganweni yesigaba kuba nzima ngoba imibono yabo ayilalelwa ngokugcweleyo.
Omunye wabatsha oxoxe lentatheli yeCITE, uWayne Ncube ukhalaze ngokuthi lapho abahamba khona emhlanganweni yesigaba, imibono yabo kayandisanga ukulalelwa.
“Imbono yethu kabayiboni njengembono ebalulekileyo nxa sisemhlanganweni. Yikho okwenza sicine singasaphatheki enhlelweni lezi,” uNcube ulandisile.
“Abatsha abanengi sebezikhangelela phansi, bazibona bengabantu abangasilutho esigabeni, njalo nxa kusiba lezinhlelo bona abafakwa kuzo.
“Sesizidle amathambo engqondo ukuba singenza njani lathi sikhanye ukuthi sikhona njengabatsha esigabeni.”
UJustine Nkiwane, omunye wabatsha, ukhankasele ukuthi bafundiswe imisebenzi yezandla ukuze labo bakwazi ukuncediseka lokuzinakekela.
Omunye njalo wabatsha, uFrance Sibanda ugcizelele ukuthi njengabantu abatsha balenhloso yokuba nxa beletha imibono yabo emhlanganweni yesigaba, ingathathelwa bengathatheli phansi.
“Nxa singaba lemisebenzi yezandla, siphatheke ekuthuthukiseni isigaba kunye lezimuli zethu, kungasisiza ukuthi sibe lesisindo emphakathini. Imbono yethu iyeyiswa ngobakasisizi kangako emphakathini,” kutsho uSibanda.
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.
Leave a Reply