Ukulondolozwa kwedamu kuletha ithemba kuzakhamizi zeStanmore

Umlobi ngu Nancy Phiri

Izakhamizi ze Stanmore sezijabulelele ukwakhiwa komgede edamu le Stanmore okhangelelwa ukuthi uzanceda ekulondolozeni amanzi kanye lokuvikela ukuchitheka kwawo.

Isigaba sibike ukuthi besihlaselwa yikuswelakala kwamanzi ngoba amanye ebechitheka.

Esinye sezakhamizi uTrevor Nkala uthe umbundu lo uzasiza ukuthi ledamu lingadiliki.

“Umgede lo uzasiza ekulondolozeni ukuthi idamu lingadiliki ngokuchitha amanye amanzi ngaphandle kwedamu ,” kusho u Nkala.

Esinye sezakhamizi u Sipho Mudzviti uthe imizi eseduze ledamu layo isizaphepha kuzikhukhula.

“Lokhu kwenza amanzi alondolozeke, imizi yethu izaphepha ngesikhathi sezikhukhula,kanti ke ekulondolozeni kwamanzi kuzasinceda ngesikhathi sezivande lakho konke okukhangelane lokulima loba imfuyo.”

Omunye wezakhamizi uKhangelani Nkiwane yena uthe ukwakhiwa komduli lowu kuvele amathuba omsebenzi kwabatsha.

“Sokuvuleke imisebenzi ikakhulu kwabatsha, bazalima amatamatisi, umumbu , batshaye izitina.Lokhu kuzathuthukisa impilo zabo,” kusho uNkiwane.

“Ukuze isigaba sethu siphile ngcono kuqakathekile ukuthi amanzi alondolozwe, lokhu kuzasiza ukuthi siphathe kuhle indawo zonke ezisigcinenela amanzi.

 Egcizelela njalo, esinye sezakhamizi u Joyce Ndlovu uthe  basebenze kuhle bebambene njengezakhamizi.

“Omakhelwane bethu beLumene labo basincedisile ngoba labo bechapha khona. Sikhangele ngabomvu ukubona Umbundu lo usilondolezela ukusasa lamanzi ethu.”

This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.