Umlobi Buhlebenkosi Ndlovu
Izakhamizi ze Shake ku ward 4, eMatabeleland North zikhala ngohlupho lwamanzi ngemva kokudabuka kwedamu kuthi lezikotsho izikotsho eziseduze azisebenzi.
Izakhamizi zibike ukuthi lapho abathola khona amanzi bahamba umango omude ongaba ngamakhilomitha alitshumi lanhlanu njalo lamanzi alokuphela endaweni yakhona.
Udubo lwamanzi luhlasela kanye lezifuyo okumele zihambe umango omude zidinga amanzi.
Omunye wezakhamizi uMaBhebhe ubike ukuthi amadamu aseduze mabili kodwa awagcini manzi.
“Elinye lamadamu akhona ladabuka ngakho amanzi wonke ngesikhathi izulu lisina ebe egeleza edlula.”
UMaBhebhe uthe izakhamizi zidinga isamende sokuvala lapha okudabuke khona.
“UMbundu lawo udinga ukuphakanyiswa usiwe phezulu kuphinde njalo kutshoniswe idamu lisiyaphansi yikho okungenza sithole amanzi.”
Uphinde wengeza ukuthi kungalungiswa idamu kungasiza lezikotsho.
“Umanjinela wayethe amaphayiphi awasafikisi amanzi njalo kulensimbi ezingekhoyo ezincedisa ukudonsa amanzi ngoba ebesephansi kakhulu.
Esinye njalo sezakhamizi umnunzana Ndlovu ongomunye abakhangela ezemigodi esigabeni uthi babeke bahlala phansi baphuma lombono wokuthi zonke izakhamizi ezikha amanzi esikotshweni zikhuphe iR5 ukuze kuthengwe izamende kulungiswe idamu.
“Uhlupho yikuthi akuzange kube labantu abakhanga betshiseka ukukhipha imali leyi.”
UMlisa wendawo uthe badinga abantu abangabancedisa ukuze kugejwe umgodi lesikolo.
“Lesikolo seShake lakho kulohlupho lwamanzi, bekuthiwe kubhalwe incwadi iyephiwa u khansila ukuthi ahambe layo kwabakhulu bedinge abangasincedisa kutholakale amanzi esikolo.”
USobhuku uNicholas Nkomo uthe kuyadingeka ukuthi kube lezikotsho lamadamu ngoba zimbalwa izikotsho ezisebenzayo ikanti amadamu akhatshana.
“Izikotsho ezinengi zifile,” kutsho uNkomo.
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.