Omama beZimbili bakhankasela ukwakhelwa indlu yokulindela yalabo asebezabeletha

By Lerato Maringire

Izakhamizi zeZimbili, kuWard 19 eUmzingwane District, zikhankasela ukwakhelwa indlu yokulindela nxa omama sebezabeletha.

Ukusilela kwendlu leyi sokubangele ukuthi abanye omama bagcine sebebelethela emakhaya, kuthi abanye babelethela endleleni besiya ezibhedlela ezikhatshana.

UTango Dube, ophethe ezempilakahle endaweni le, uveze ukuthi kuyadingeka ukuthi omama babe lendawo yokulindela eseduze, kodwa okwamanje uHulumende kasenelisi ukuwufeza lumbono ngenxa yokuswelakala kwemali.

“Omama bafisa ukuba lendlu yokulindela eduze leclinic, kodwa okwamanje uHulumende kakayakhi. Lokhu kwenza kube nzima kubo, ikakhulu nxa sokumele baqale ukuhlala kude lendawo yokubeletha, kungelazimali zokuhamba loba indawo yokuhlala,” kutsho uDube.

Uqhubeke wathi indlu enjalo izanceda kakhulu ekwehliseni ingozi zokubelethela ekhaya, njalo izakhamizi zifisa ukuthi kuqalwe uhlelo lokwakha kusetshenziswa imizamo yebandla, amalunga omphakathi kanye lohulumende.

UVelile Sibanda, omunye wabomama ohlala esigabeni seZimbili, uveze usizi lwakhe ngodaba lokusilela kwezindlu zokulindela eduze kweclinic.

“Lokhu kubuhlungu kakhulu kithi omama, ngoba nxa sesikhulelwe, kumele sithole imali yokuhamba ngemota sisiyakhona lapho okulezindlu zokulindela. Kuyadanisa ngoba iclinic silayo lapha eduze, kodwa asilazo izindlu zokulindela kuphela,” kutsho uSibanda.

Esinye isakhamuzi, uFlorence Sibanda, uvumelane lombono, esithi ukusilela kwezindlu zokulindela yikho okubangela ukuthi abanye omama bagcine sebebelethela emakhaya.

“Abanye bayabe bengelamali yokudinga imota ezibathwala zibasa esibhedlela esikhulu iUnited Bulawayo Hospitals (UBH), ngakho ke bagcina sebebelethela emakhaya,” kutsho uSibanda.

Ukhansila walendawo uWard 19 eZimbili, uBaba Pilate Sibanda, uthe uyazama ngazo zonke izindlela ukulungisisa loludaba.

“Ngizama ngazo zonke izindlela ukuthi omama bathole izindlu zokulindela, kodwa okwamanje angikenelisi ukubakhela. Lobubunzima omama abakhulelweyo lapha eZimbili abahlangana lalo lubuhlungu kakhulu. Kuyangithinta kakhulu nxa ngisizwa ukuthi sokulomama obelethele ekhaya ngenxa yokusilela kwezindlu zokulindela, ikanti iclinic ikhona eduze,” kutsho ukhansila.

Abomama baseZimbili baqhubeka bekhuthaza uHulumende kanye lenhlanganiso ezitshiyeneyo ukuthi bazwe isikhalazo sabo sokwakhelwa indawo yokulindela, ukuze kube lula ukubeletha kwabesifazana abasemakhaya.

This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.