Umlobi ngu Lubelihle Sibanda
Izakhamizi zeNyandeni kuward 4 sebamukele uhlelo lokufuya inyosi, oluncedisa ukuthola inzuzo kwabasakhulayo labadala besigaba.
UMolly Moyo omunye wabafuyi benyosi, uchasise ukuthi uhlelo lolu lusiza ngokuletha imali njalo yindlela yokuzilibazisa.
“Mina kuyangithokozisa ukufuya inyosi ngoba kuyanginika imali ngenelise ukuthengela abantwana ukudla. Njalo inyosi zingumuthi emzimbeni yethu ziyaselapha. Amakhafitho esiwakhafula nxa siqeda kudla inyosi lawo ayapheka amakhandlela.”
“Khathesi kuleqembu labomama, obaba lentsha esigabeni seNyandeni, sifisa ukuqhubekela phambili nxa singathola ukuncediswa. Sifisa ukuba locingo lokugombolozela amabhokisi enyosi wonke. Okwakhathesi sincediswa yinhlanganiso ethiwa yi B.I.C.C. Sifisa ukuthola lamanzi okuthelele izihlala zamaluba adliwa zinyosi.”
Omunye ofuyayo, uMongiwethu Moyo uthe: “Uhlelo lwenyosi lungithokozisa ngokuthi siyenza imali ngoba siyathengisa uluju. Njalo siyathola isikhathi sokuzilibazisa siyintsha. Kodwa besifisa ukuthi sithole amabhokisi enyosi abemanengi ukuze lathi sibe banengi kuhlelo lwethu, lokuthi sithole ucingo lokuvalela izihlahla zingadliwa zinyamazana.”
