Umlobi ngu Happiness Moyo
Omama beNyandeni eGwanda sebeqalise uhlelo lokulima ezivandeni ukuze bathole ukudla lezimuli zabo ezinye bethengisa.
Omama abahlala kuvillage 6 sebesenelisa ukunakekela izimuli zabo ngokulima izilimo ezehlukeneyo ezingandini. Balima umbhida, amatatisi, i-onion, indumba lezithelo ezehlukeneyo ezibalela ama paw-paw lama banana.
Izilimo lezi bayavuna ezinye badle lemuli zabo kuthi ezinye bathengise ukuze bathole inzuzo.
Intatheli ye CITE ikhulume lo Sitshengisiwe Sibanda, omunye wabomama, ochasise kabanzi ukuthi ukulima engadini kumsiza njani lemuli yakhe.
“Ingadi le iyangisiza kakhulu njengomama olabantwana abathathu. Ngiyenelisa ukuthola istshebo sokuthi abantwana balale bedlile. Eyinye ingxenye yemali le ngiyenelisa ukuthenga i-airtime ngithengisele izakhamizi. Lokhu kuyangezelela inzuzo yami.”
UNozipho Moyo laye olimayo ingadi uthe inzuzo yakhe iyamenza ayenelise ukuthengela imuli yakhe ukudla lokuhambisa abantwana esikolo.
