Umlobi ngu Christabel Sibanda
Ukusetshenziswa kwezidakamizwa eluhlwini lweStezi, e Matabeleland South sekukhuphule izinga lodlame esigabeni.
Izidakamizwa ezilentengo ephansi okugoqela isidakamizwa esidumileyo intshengu sekubangele ukuthi inengi lentsha kulesisigaba lingabe lisathakazelela ukuya ezikolo ngoba bechitha isikhathi sabo bezilibazisa ngezidakamizwa.
Omunye wentsha, u Busisani Ndlovu owaqala ukunatha untshenku esaseskolo emva kokuyengwa ngabangane bakhe ubike ukuthi imbangela yokuthi abantu abatsha benathe yikuzama ukulalisa imicabango yabo ukuthi bengacabangi ngalokhu okubahluphayo.
Undlovu yena ubuye waveza ukukhathazeka ngezinga lodlame olwenziwa yintsha lapho isithe yanatha izidakamizwa.
“Okusihluphayo singanatha siyabulalana, siyagwazana. Intshengu yona iyalimaza emzimbeni, iyabulala amaphaphu lezibindi njalo singayinatha sibalezibindi zokubulalana.”
UNdlovu uthe inengi lentsha sebezenza iziqhwaga zokubulala abanye abantu ngenxa yezidakamizwa.
“Abanengi sebenatha besesikolo lokubhema lembanje bebancane yikho okwenza bebulalane, abasahloniphi labantu abadala babaphendula noma yini abayifunayo, lezandla zabo sezilula sezikwazi lokutshaya abantu abadala sebekhuluma lehlamba ezethusa uzulu wonke.”
Ungezelele ngokuthi izakhamizi sezihlala zithithibele ngokwesaba intsha esithe yanatha izidakamizwa.
UNdlovu uphinde wathi okunye okuyimbangele yokuthi intsha isebenzise izidakamizwa esigabeni yikuswelakala kwendawo zokuzilibazisa lokwenza imisebenzi yezandla.
