Umlobi nguLerato Nyoni
Izakhamuzi zeZimbili Extension kuWard 19 eMzingwane zilohlupho lwamanzi ngenxa yokuswelakala kwezibholane okwenza bahambe umango omude besiyadinga amanzi.
Ilunga lekhomithi elikhangele okwamanzi esigabeni, uLinah Ndlovu uthe uhlupho lolu lwaqala ngomnyaka ka 2000.
“Izakhamizi njalo zikhala ngokuthi kabalezimali ezokuthi batshaye beyisigaba kulungiswe izibholane ezifileyo,” watsho uNdlovu.
Umlisa uWilson Mpala uthe ukufa kwezibholane kubangelwa yikuthi ziyandelwa.
“Abantu basuka khatshana belanda amanzi kwezinye izibholane yikho okubangela ukuthi izibholane zicine zisifa. Kunjalo azitholi ithuba lokuthi ziphumule lokho yikho okubangela ukuthi zicine zisifa masinyane.”
UMpala wengeze wathi zingafa zithatha isikhathi eside ukuze zilunge.
“Lokho yikho okubangela ukuthi abantu baswele amanzi ngoba izibholane zihlala zifile. Kuyadingeka ukuthi kugejwe ezinye izibholane abantu bengahambi umango omude besiyadinga amanzi.”
Owezempilakahle eSigabeni seZimbili Extension, uVillage Health Worker, uNonhlanhla Ngwenya uthe kudingakala uncedo lokuthi balungiselwe izibholane ukuze bathole amanzi ngokuphangisa.
“Izibholane ziyaswelakala esigabeni ngoba abantu banengi ikakhulu kuSigaba 3 abala isibholane bayenza okokuyakukha kusigaba 2 njalo lapha esigabeni silabantu abadala abangenelisiyo ukukha amanzi ezindaweni ezikhatshana,” watsho uNgwenya.
UMqiniseli Ndlovu uthe lokhe wafika eZimbili ngomnyaka ka2000 abantu lokhu belohlupho lwamanzi.
“Safika lapha kungela manzi kusetshenziswa iwindmill. Sicela inhlanganiso kaHulumende ukuthi isincedise kakhulu endabeni yamanzi kodwa yakwanisa ukuthi isigebhele imgodi wamanzi owodwa yazotshintsha iWindmill yafaka isibholane,” watsho uNdlovu.
“Kungokunjalo uhlupho lwamanzi alukapheli lapha sicela ukuthi uHulumende asifakele izibholane.”
UKhansila kaWard 19 uPilate Sibanda wavuma ukuthi okwenza ukuthi eZimbili kungabi lamanzi yithi akula mali yokwemba izibholane.
“Kungakho ke sidinga ukuthi sibe lezibholane ezingaba litshumi lanhlanu lokhe sahlaliswa lapha ngomnyaka 2001 silezibholane ezimbili kuphela.”
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.