Umlobi ngu Thandeka Sibanda
Izakhamizi zeNyandeni, eMatabeleland South, zikhalaza ngomgwabo osugugudekile okwenza zicine zingafinyeleli kuzindawo ezikhatshana.
Izakhamizi sezicele ukuthi umgwaqo ulungiswe ngokuphangisa ngoba isimo somgwaqo sesiyingozi kubatshayeli bezimota, izakhamizi, kanye lezinqola.
Omunye wezakhamizi uSiwinile Mlilo uthe bacela I District Development Fund (DDF) ukuthi ilungise umgwaqo.
“Sicela umgwaqo wethu ulungiswe ngokuphangisa ngoba usufile osokusenza izimota ,izinqola kanye lezakhamizi zingahambi kuhle. Kumele sikhulumisane labe D.D.F babuye bezosinceda ngokusilungisela umgwaqo .”
Esekela okukhulunywe ngu Mlilo, uGelina Bhebhe uthi “Lokho okukhulunywa nguNkosazana uSiwinile Mlilo ngivumelana lakho ukuthi umgwaqo ulungiswe ngokuphangisa.”
Omunye wezakhamizi u Angela Dube uthe phambi komuzi wakhe kuhlala kusiba lengozi eyethusayo usehlala esevalweni.
UMkhululi Bhebhe, ongomunye wabatshayeli eNyandeni yena uthe izimota sezifika nzima kwenzinye indawo ngenxa yomgwaqo omubi.
“Asisatshayeli kahle ngenxa yokuthi umgwaqo usufile lokho kungacina kubangela ingozi, ezinye izimota eziya eMtshabezi High School lezinye eziya eMtshabezi Hospital zifika nzima ikakhulu izimota ezincane kungenxa yomgwaqo osufile.”
Ukhansila weNyandeni, uNokuthula Moyo, uvumile ukuthi umgwaqo ugugudekile kodwa wathi balindele ukuthi ulungiswe nxa i-grader ingafika.
“Igrader iyodwa amaWards angu 24 kuthatha isikhathi eside ukuze kufike kithi yikho okudala ukuthi umgwaqo wethu ugugudeke,” kutsho u Khansila Moyo.
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.