Umlobi ngu Talent Sibanda
Izakhamizi ze Nyandeni ku Village 5 sezi sungule uhlelo lukazibuthe, lokuqogelela imali ukuze bathenge izinto zokusebenzisa, njalo lokubasiza ngesikhathi semfa.
Ibizo lohlelo lolu kuthiwa Phakama malavi.
Kuhlelo lolu izakhamuzi zihlanganisa imali zithenge amabhodo, imiganu, lezinye impahla ezingasiza nxa kulomsebenzi ofana lemfa, umtshado leminye imicimbi eyehlukeneyo.
Impahla le balakho ukuyibolekisa kwezinye izigaba bathole imadlana yokufaka esikhwameni senhlanganiso.
USikhalani Nyathi, umama oleminyaka engu 71, ongumngcini sihlalo we Phakama malavi, uchasise kabanzi ngohlelo lolu.
“Siqale uzibuthe ngoZibandlela. Sitshaya ama ZAR20 ngenyanga, injongo ngeyokuthi sithenge imganu lamabhodo azasincendisa nxa kulemicimbi kanye le zimfa.”
UMemory Dube yena ongumsekeli kamgcinisihlalo uthe uhlelo lolu luyancedisa abatsha.
“Amabhodo lezitsha lezi sikhangelele ukuthi sibolekise amanye amavillage nxa engaba lemodlalo enjenge mitshado leminye imbuthano besesiba bhadalisa imali.”
“Izakhamuzi ziyaluthakazelela uhlelo lolu. Zithi zikhangelele ukuthuthukisa isigaba ngoba bebehlangana lobunzima sokumele beboleke okukade kubisela emuva umsebenzi.”
