Umlobi ngu Unity Ncube.
Izakhamizi zeNyandeni kuward 4 zikhala ngokulungiselwa ibholoho elisemfuleni uLumeni.
Izakhamizi lezi zithi kudala zikhalaza ngalelibholoho njalo ukungalungiswa kwalo kuhlukumeza abantwana besikolo abaphoqeleka ukuthi bengayi esikolo nxa izulu lisina.
UAbel Moyo uthe balusizi njengezakhamizi ngoba bekhalaza minyaka yonke ngaleli bholoho.
“Minyaka yonke siyahlala phansi silesikhalazo esifanayo. Ngikhuluma kunje eMtshabezi Mission kuyakhiwa iNyuvesi pho imota eziyabe zithwele into zokwakha ziyahamba nzima ngenxa yebholoho manje njengezakhamizi kuyasihlukumeza,” kutsho uMoyo.
U Adam Bhebhe yena owake waba ngukhansila wesigaba uthe kulesibanga eside abantu bekhalaza ngaloluhlupho.
“Ngomnyaka ka2021 ngisesihlalweni sikakhansila ngalwisa kakhulu ukuthi isikhalazo sezakhamizi silungisiswe. Ngaphakama ngaya kumahofisi ngodaba lolu ngafika kwaba khona isithembiso ukuthu kuzaba khona utshintsho oluzayenzakala,” kutsho uBhebhe.
“Ngabuya njalo ngahlala phansi lezakhamizi sengibatshela impendulo yesikhalazo sabo babonakala besiba lokuthokoza besizwa ukuthi isikhalazo sabo sizalungisiswa, kodwa kuze kube lamuhla asikalungisiswa.”
UBhebhe uthe ngesikhathi sezulu abafundi beqiwa yizifundo zabo njalo yiwo umgwaqo oya esibhedlela esikhulu iMtshebezi.
“Ngaze ngaphuma esihlalweni sikakhansila isikhalazo sezakhamizi singalungisiswanga. Ngakhathazeka ngoba ngangilesifiso sokulungisisa ibholoho,” kutsho uBhebhe.
UChairperson wevillage 3, uSimon Nkala uthe izakhamizi sezike zamlanda ngokuthi aphakamele indaba yebholoho.
“Izakhamizi zithi ngiphakame njalo ngiyekhuluma losobhuku kanye lokhansila ukuthi izakhamizi lokhe zilesicelo ngokulungiselwa ibholoho. Sizahlala Sikhala njalo nje ngaloludaba.”
UNkala uthe bazazama njalo ukukhulumisana lokhansila azame ukuhambisa isikhalazo sabo kwabanye abangabancedisa ukuze udaba lwebholoho lulungisiswe.
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.