Izakhamizi zeNyandeni zikhalaza ngokuzithwala kwabantwana besesebancane
![](https://cite.org.zw/wp-content/uploads/2019/10/teenage-pregnancy.jpg)
Umlobi ngu Nokuthaba Ndlovu
Abantwana abanengi abeNyandeni sebezithwala bebancane okubangelwa yikuswelakala kolwazi lokuzivikela emacansini.
Ingxenye yabantwana abanengi abazithwalayo iqalela eminyakeni yetshumi lanhlanu, bacine sebesehluleka ukuphutshisa izifundo zabo.
ICITE ixoxisane labanye balawa mankazana azithwala esasemancane ukuthi izwisise inhlupho abahlangana lazo.
UCharity Mthunzi ulandise ukuthi wayehlala yedwa esiya esikolo, waswela umuntu omxhwayisayo ngokuzivikela.
“Ngazithwala ngimncane ngileminyaka elitshumi lanhlanu (15),okwenza ngazithwala yikuthi ngangihlala ngedwa njalo ngingela ongifundisa ngobubi bokuya emacansini ngimncane, ngangingazi ukuthi ngingavikela kanjani ukuthi ngingazithwali.”
UPolite Ndlovu, ongumzali esigabeni, ukhuthaze ngokuthi kumele kube lenhlelo zokufundisa amankazana ngokuzivikela emacansini, kunye lokubazisa ngobubi bokuya emacansini bebancane.
“Kuhle ukuthi abantwana bafundiswe, lokuthi baye kwezinye kwezinye indawo bathole ulwazi olutshiyeneyo.”