Izakhamizi zeNyandeni zikhalaza ngokuphuza kwenhlanyelo kaHulumende

Umlobi Sithandekile Sibanda.

Izakhamizi ze Nyandeni ku ward 4  zikhalaza ngokuphuza  kokulethwa kwenhlanyelo kaHulumende lapho belungiselela isikhathi sokulima.

Izakhamizi lezi ziphinde zakhalaza ngokuthi kwesinye isikhathi ziyabhadala imali yokulethelwa inhlanyelo esigabeni sabo.

Omunye wezakhamizi uSithobile Sibanda uthe inhlanyelo yandise ukubuya sebeqedile ukulima.

“Okokutshaya amagodi kuyasilimaza, thina abanye sihlezi sigula sitshaya amagodi sinjalo sigula sithi sesitshayile amagodi inhlanyelo isithole sesiqedile ukulima,” kutsho u Sibanda.

Usibonakele Ncube yena uthe izakhamizi zandise ukulima inhlanyelo ingakabuyi.

“Sathenjiswa ukuthi siyaphiwa inhlanyelo mahala kodwa nxa isibuyile siyabhadaliswa ama R25 kusiya ku R35 kuthwe yimali yemota yokuthwala. Kwesinye isikhathi inhlanyelo ibuya ungelamali ngapha siyabe sesitshayile amagodi sicine singayitholanga ngokuswelakala kwemali.”

UNcube ukhalaze ngokuthi abantu asebegugile bayabe betshaye nzima ugatshompo bephinde beswele inhlanyelo ngenxa yokuswela imali yokubhadala imota eletha inhlanyelo.

Esinye sezakhamizi uCaroline yena uthe ulesifiso sokwazi ukuthi uHulumende uyakwazi ukuthi abantu emaphandleni bayayiswela inhlanyelo.

Egcizelela njalo, u Nhlanhla Mpofu uthe kuqakathekile ukuthi izakhamizi zibe lomhlangano loSobhuku kanye lokhansila ukuze bazwisise ngodaba lokubhadaliswa izimali.

“Kwathwa siyaphiwa inhlanyelo mahala kodwa sesibhadala, ogogo bayayithathaphi imali yokuthenga inhanyelo bona beswela imali yesigayo,” kutsho uMpofu.

Uthe njengezakhamizi bacela ukuthola iqiniso  ngento eyenzakala esigabeni sabo ngoba kwezinye indawo ingenzeki.

Esinye njalo isakhamizi uSiduduzile uthe ulokudana okukhulu ngoba imali yokubhadala inhlanyelo beyithola nzima.

‘Ngiphinde ngibe lokudanangoba inhlanyelo kwesinye isikhathi ibuya sesihlakula, siyabe sizahlanyela ngaphi. Inhlanyelo ibuya sesize sathenga eyethu inhlanyelo ngoba amagodi siyabe sitshaye kudala siyenzela ukuthi izulu lifike sesiqedile.

This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.