Izakhamizi zeNyandeni zicela isibhedlela sokubelethela
![](https://cite.org.zw/wp-content/uploads/2020/03/maternal-deaths-728x405.jpg)
Umlobi Ngu Memory Dube
Abahlali beNyandeni ku Ward 4, eGwanda bacela ukwakhelwa isibhedlela sokubelethela esiseduze labo.
Izakhamuzi eziku Village 3 kusiyafika ku 7, bathi basebenzisa izibhedlela zeMtshabezi lase Stanmore nxa besiyabeletha.
Bachasise ukuthi lesi eseMtshabezi siphetsheya komfula ngakho nxa izulu linile kubanzima ukufinyelela kuso.
Bakhalaze njalo ukuthi umango omude wezibhedlela ubangela ukuthi bahambe ukuyalindela kusasele isikhatshana ukuthi babelethe, okuyinto ebahlukumezayo ngoba abanye abantwana babo bayabe besele bodwa ekhaya bengela muntu obanakekelayo.
USimilo Moyo ohlala ku village 5 uthe: “Ukuba khatshana kwezibhedlela kungihlukumeze kakhulu ngesikhathi inyanga yami yokubeletha isifikile. Ngitshiye abantwana bodwa sengisiya lindela ngoba bekungavumi ukuthi ngihlale isisu size sibe buhlungu.”
“Kungaba lesinye isibhedlela kuzayehlisa amathuba abo dokotela ekusebenzeni ngoba siyabe sibanengi omama esifuna ukunakekelwa ngakho bacina bengela thando lomsebenzi wabo.”
UMoyo ukhalaze njalo ngemali ephezulu ebbhadalwayo nxa omama bebeletha ngokuhlinzwa.
“Ngabe siyathola njalo ukubeletha ngaphandle kwembadalo. Ukubeletha ngokuhlinzwa kubiza i$60 kusiya phezulu. Kuyasinzimela ukuthi sithole imali engaka.”