Umlobi ngu Bekezela Nyoni
Izakhamizi zeBayethe ku ward 14 eMzingwane zikhala ngokuswelakala kwamanzi kusukela ngomnyaka ophelileyo okubangelwe yikungani kuhle kwezulu.
Lokhu sokutshiye abantu lezifuyo ebunzimeni.
Unkosikazi uNomsa Tshuma, oleminyaka 48, oyisakhamuzi sakulindawo uthi yena uhamba amakhilomitha ayisikhombisa (7km) esiyadinga amanzi lokunathisa inkomo.
“Amanzi la uyawalindela okwesikhathi eside,” watsho uNkosikazi Tshuma.
Ubaba uNdlovu utshele intathelindaba zeCITE uthi usefelwe zinkomo ngenxa yokuswelakala kwamanzi.
“Akula manzi okunika izifuyo lazo sezikhathele ngokuswelakala kwamanzi. Uhlupho lwamanzi luyasikhathaza kakhulu,” watsho uNdlovu.
Ugogo umaNxumalo oleminyaka engu 61, uhlala yedwa njalo amanzi uwakha khatshana.
“Ngihamba amakhilomitha amahlanu (5km) ukuyadinga amanzi,” etsho ekhala ngokukhathala komzimba.
Umama uMaMpala ole minyaka eyi42 uthi uhamba amakilomitha ayisithupha (6km) lenkomo zakhe esiyadinga amanzi.
Ukhansila ubaba uJohn Jimara Sibindi uthembise izakhamizi ukuthi kusiyafika inyanga ka Mfumfu izikotsho ziyabe sezigejiwe.
