Umloni ngu Thenjiwe Moyo
Ukutsha kwezilimo emasimini sokubangele ukubhaha kwendlala eNyandeni ku Ward 4, village 4.
Izakhamizi zikhalaza kakhulu ngendlala ekhona edalwe yikuswelakala kwezivuno emasimini okubangelwe yisomiso.
Intatheli yeCITE ixoxisane lezakhamizi ezithile ngaloludaba.
UPricilla Bhebhe yena uthi “kunzima kakhulu lonyaka. Ukusweleka kwezulu kungenze ngehluleka lokubhadalela umntwana obesebangeni laphezulu (form4), obekufanele abhale imihloliso yakhe. Ngandise ukulima ngithengise isivuno sami. khathesi imadlana engilayo ngibophelele ukuthi imuli yonke ithole ukudla.”
Esinye njalo isakhamuzi uThemba Moyo ongumlimi oyaziwayo uthi isomiso lesi simhlukumeze kakhulu. “Mina bengingu muntu oziphilela emhlabathini ,manje ngokuswelakala kwezulu kutsho leyami impilo iphelile. Imuli yami izalamba”
UAbel Siziba ugcwalise inkulumo kaMoyo wathi “thina inengilethu esigabeni siziphilisa ngokulima, yonke into kayihambi nxa kutshile. Lezifuyo ziyafa kazila kudla lamanzi, okuyikho obekusingcedisa kakhulu.”
