Umlobi ngu Buhle Twala
Esinye sezakhamuzi zemaMahwanke eGwanda kuward 7, uSiwelile Dube useqale ibhizimusi yokufuya inkukhu osekuphathise isigaba ngesitshebo ngesikhathi lapho ilizwe libhekane lendlala.
UNkosikazi Dube ubike ukuthi ibhizimusi yakhe wayiqala ngenkukhu eziyingcosana ngokuya kwesikhathi yakhula.
Ufuya imhlobo yenkukhu ezitshiyeneyo ezibalela amasaso, kanye lenkukhu emnyama ebekela amaqanda amnyama ayithole eSouth Africa.
Ubike uthi uzadinga ulwazi abakhangela ngezifuyo (Vertinary) ngokufuya inkukhu leyi emnyama.
“Ngaqala ngokufuya inkukhu eziyingconsana ezemakhaya, ngalandela ngamathendele okuyiwo angincedisa ukungezelela inani lenkukhu. Ngalandela ngengalukhuni ngithengisa lamaqanda kulabo abafuna isitshebo.”
Uthi ukufuya inkukhu kuhle kakhalu futhi kulosizo olukhulu.
Omunye wezakhamuzi ongumakhelwane kaDube, uNokulunga Ndlovu ukhulume isithi ” inkukhu zikamakhelane zisinceda kakhulu njengalonyaka izulu lingananga ngendlela, vele asilamifushwa njengeminyakeni edluleyo, sesiphephela komakhelwane ukuze sizuze isitshebo.”
UNkosikazi Ndlovu uthe bathenga amaqanda, inkukhu kunye lamatsiyane ikakhulu labo abafuna ukufuya.
uAgnes Chihatu omunye wezakhamizi ugcizelele kabanzi ngobuhle bokufuya inkukhu obenziwa ngumakhelwane wabo.
Uthe usezibonele ngawakhe ukuthi akula nkukhu ezingela bhizimusi.
UDube yena uthi akulula ukufuya inkukhu lezi ikakhulu nxa ungela zinto zokusebenzisa ezaneleyo lokuthi nxa izilugu zincane, ngoba lezinkukhu akumelanga zifuyelwe ndawonye kusenzelwa ukuthi zingathelelani imikhuhlane.
“Abantu babehleka kakhulu nxa ngisithi ngifuya inkukhu zekhaya bethi azilabhizimusi njalo ziyaphuza ukukhula, bethi ngabe ngifuya ezesikhiwa (amabroiler) ngoba ziyaphangisa njalo zilemali ngathula ngaqinisela ngoba ngisazi isifiso sami njalo ngikhangela lesikhwama sami ukuthi asilalutho. Ngabona zingcono lezinkukhu ngoba kazikhethi mhlobo wokudla zidla lobangumumbu,inyawuthi kumbe amabele okuyikho okululula ukutholakala njalo okungadingi imali enengi. Namhlanje ngithi phambili ngenkukhu makhaya”.
UDube ungezelele amazwi akhe esithi ukhangelele ukuthi athengise inkukhu zakhe ngekhefu lekhisimusi ngoba zivele sezikhulile.
