Umlobi wendaba ngu Charity Mthunzi
Izakhamizi zaseNyandeni e Gwanda ku Village 6, ward 4, zithithibele ngemva kokutholakala kokhakhayi lwenkomo ezimbili ezibulewe zahlinzelwa emasimini.
Izigilamkhuba zalesiga zitshiye umswane, le nkomo yesithathu ebiganyuliwe kuphela yangasahlinzwa.
Isehlakalo lesi senzakale ekuseni ngoLwesibili mhla zilitshumi lambili lantathu ngo Ngcwabakazi ( 23 September 2025).
Umlobi uxoxisane lo Nico Moyo onguye umnikazi wezifuyo ochasise kabanzi ngomonakalo omehleleyo.
“Ngithithibele kakhulu ngesehlakalo esingiveleleyo. Inkomo zihlinzelwe phakathi emasimini ngizivalele amasimu asekhaya .Nxa sengisithi sengisiyanathisa izifuyo ngithole azikwananga ngibhode lamasimu ngithole ezimbili zihlinziwe eyodwa iganyuliwe kodwa abasakwazanga ukuyihlinza,” kutsho uMoyo.
Uthe lesisiga simzwise ubuhlungu obukhulu ngoba sebefuyela amasela.
Usobhuku u Johane Moyo uthe njengesigaba bathithibele ngomonakalo lo.
“Kubuhlungu ukufuyela amasela , siyisigaba sithithibele siswele lokuthi senzeni sizamile ukuthi kumbe ubusela bungayehla ngokuthi sivalele izifuyo manje sebezithatha noma zisesibayeni.” Kutsho uMoyo .
Abahlali besigaba bathi bathithibele abasakwazi ukuthi bengavikela njani izifuyo zabo ngoba sezitshontshwa zisesibayeni okutsho ukuthi azisaphephanga emaseleni.
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.
Leave a comment