Umlobi nguRejoice Ngwenya
Abazali abalabantwana abafunda e Nyandeni Primary School eGwanda sebejabulele intuthuko eza esikolo kulandela inhlelo zokwakhiwa kwelab yokufundelwa izifindo ze science kanye lamakhompuyutha.
Umnumzana Patrick Moyo, ongumgcinisihlalo weVillage 4, uthe izakhamizi bezisilela kakhulu kwezobuchwepheshe (technology).
“Njengezakhamizi lathi sikhangelele ukusizakala kakhulu ngoba siyasilela ku technology. Njengesigaba siphatheka ngokutshaya izitina lokugebha inhlabathi yokwakha kanye lokukha amanzi,” kutsho u Moyo.
Ugcizelele wathi bakhangelele ukuthi ilab iqale ukwakhiwa ekuqaleni komnyaka ozayo.
UMoyo uthe ilab le izaphathisa abafundi kakhulu ngoba bazabe sebelezifundo eziphezulu.
UJoseph Ndlovu yena okhangele ngokutshaywa kwezitina uthe izakhamizi zeNyandeni kanye le khomithi yesikolo benza umhlangano lapho abavumelana khona ukuthi umuzi ukhiphe izitina ezingu 150.
“Sasikhangele ukuthi abantwana abafunda kulesisikolo basuka kumavillage ayisitshiyagalombili atshiyeneyo. Ngobunengi babantwana abanye sebeqedile ukutshaya izitina, lokhu kutshengisa ukuthi izakhamizi zeNyandeni ziyathakazelela ukuthi kube lesakhiwo lesi eselab,” kutsho u Ndlovu.
Omunye umhlali, uSibusisiwe Ndlovu, uthe, “Sijabule kakhulu ukuthi abantwabethu sebezathola ulwazi olungcono ukudlula obelukhona.”
UKhumbula Nkomo yena uthe bathokozela ukuthi isikolo sizaphiwa amacomputers mahala bengakhuphanga imali.
USelitha Khumalo yena uthe ukwakhiwa kwesakhiwo lesi kutshengisa ukuthi isikolo siyathuthuka.
Omunye wababalisi eNyandeni Primary School uthe intuthuko le izaphakamisa izinga lezifundo.
“Siyathokoza ngokwakhiwa kwelab. Isigaba saseNyandeni sizancedakala ngoba abantu bahlezi emakhaya abalamisebenzi ngakho sebezaba lethuba lokubuya bezofunda amacomputer, kuzabe kulomuntu ozabe ebafundisa.”
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.