Umlobi nguNancy Phiri
Izakhamizi ezikhubazekileyo zeStanmore zikhala ngokuhlukunyezwa yimpilo ngenxa yokungakwazi ukuziphilisa, zicela ukusekelwa ngemisebenzi lempahla ezingabanceda empilweni yabo yansuku zonke.
Bathi ukukhubazeka kubalimaza kakhulu empilweni, njalo ababoni ikusasa elihle ngaphandle kosizo oluqondileyo.
Omunye wabo, uAlice Ncube, uthe njengoba ehlala yedwa, impilo isuka ibe nzima ngaphandle kosizo oluqondileyo oluvela emphakathini.
“Sicela uncedo ngama-wheelchair ukuze sikwazi ukuya enkonzweni lokwenza imisebenzi encane esingenelisa ukuyenza. Ukungakwazi ukuhamba kusiphazamisa kakhulu,” kutsho uNcube.
UGladies Mbebe wengeze wathi abasenelisi ukusebenza emasimini njalo impilo inzima kakhulu.
“Angisenelisi ukwenza imisebenzi yansuku zonke, ikakhulu emasimini. Siyaludinga uncedo, futhi sifisa ukuthi abantu bazwisise ubunzima esibhekana labo,” kutsho uMbebe.
UDuduzile Ndlovu uthe yena uhlukunyezwa ngabantwana abancane ngesikhathi ekhulumisana labo.
“Ngiyahlekwa nxa ngikhuluma, ikakhulu ngabantwana abancane. Lokho kungihlukuluza kakhulu emoyeni, kwenza ngingathokozi empilweni yami. Kodwa nxa ngiya enkonzweni, ngizizwa ngikhululekile futhi ngilokuthula,” kutsho uNdlovu.
Omunye osemutsha, uChexman Maphosa, uthe lanxa esakhulayo, ukukhubazeka kumvimba ukuthi aphile impilo ayifisayo njengabanye.
“Angenelisi ukuhamba imango emide loba ukuma isikhathi eside ngenxa yokukhubazeka enyaweni. Sifisa ukuthi lathi siphiwe amathuba okusebenza esigabeni. Singenelisa ukwenza imisebenzi efanele thina, njengeyokufuya inkukhu, ukuze siziphilise,” kutsho uMaphosa.
USobhuku wesigaba, uMillion Dube, uthe abantu abakhubazekileyo akumelanga beyiswe, njengoba belakho okunengi abangakufaka emphakathini.
“Kumele sibathathe njengabanye abantu, singabayeyisi. Nxa kukhona ukusatshiswa esigabeni, labo kabathole. Futhi nxa kulemihlangano, bavunyelwe ukukhuluma, babe yiziphathamandla kumazinga abo,” kutsho uDube.
Wengeze wathi kudingeka ukufundisa umphakathi ngokuhlalisana kuhle labantu abakhubazekileyo ukuze bazizwe beyinxenye yomphakathi, bekhululekile njalo bejabule.
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.