Umlobi ngu Memory Dube
Izakhamuzi zikavillage 5 ku ward 4 eNyandeni zisebenza ngokuzimisela lokubambisana bevala indonga eziyingozi esigabeni.
Lezi indonga zisuka kumfula uLumeni njalo sezidilikela zisiya ngasemakhaya osokubangele izakhamizi zihlalele evalweni ikakhulu nxa kungaba lezulu elikhulu emnyakeni ezalandela.
Esinye isakhamuzi, uSikhalani Nyathi usilandisele ngalolu hlelo lokuvala indonga lezi.
“Sibone kungcono ukuthi njengabahlali sisebenzise esilakho ukuthi sizame ukuvala indonga lezi ngakho sisebenzise umshaba, I iskusha kanye le dolofiya. Sihlanyela sivalela amanzi ukuze angagebhi ngamandla lezi indonga.”
Esinye isakhamuzi uLondani Moyo ukhulume emele abatsha uthe kuqakathekile ukuvala indonga lezi khathesi izulu lingakabuyi.
“Sifaka amatshe izihlala kanye lenhlabathi lakho ngokunye okungasincedisa ukuvala njalo izakhamizi ziyawuncoma umsebenzi lowo ngoba bavikela ukugugudeka komhlabathi. Siyafisa ukuncediswa kakhulu kungakafiki isikhathi sezulu ngoba zisengozini nxa izulu lingaba linengi ngomnyaka ozayo.”
