Umlobi ngu Talent Dube
Abahlali base Mahwanke, eGwanda abaphathekanga ngokuswelakala kwababalisi esikolo se Mahwanke Primary, osokubangele ukuthi inengi labantwana lisuke khona liyefunda kwezinye indawo.
Izakhamizi zichasisele intatheli ye CITE ukuthi ababalisi abahlali kulesi isikolo, babuya okwesikhatshana besebesuka besiya kwezinye indawo.
“Kubuhlungu okwenzakala ngabantwana bethu esikolo lesi. Ababalisi bayasilela. Uyathola abantwana abakubanga lesihlanu, bendawonye labakubanga lesikhombisa. Lokhu kuyabaphambanisa ezifundweni zabo ngoba izifundo zabo zahlukene,” omunye wabazali utshilo.
Omunye umzali uthe sowatshintsha abantwabake isikolo.
“Abami abantwana bathathu. Omunye ukubanga le ECD, ngamtshiya ese Mahwanke ngoba umango wokuya esikolo esikwesinye isigaba ubungamsinda. Omunye ukusigaba sesithathu, omunye ukusigaba sesihlanu. Sebefunda esikolo esisesigabeni saphetsheya. Umango abawuhambayo mude,” uchasisile umzali.
“Nxa izulu lisina siyabaqhuba abantwana siyebachaphisa isifula, nxa sebetshayisa ababalisi babo labo bayaphana amazopha okubachaphisa. Yindlela ebuhlungu leyi yokuthi abantwana bafunde.”
Abazali bathe ezinye zezizatho ezenza ababalisi basuke esikolo yikuswelakala kwamanzi lamandla kagetsi ukuthi impilo zabo zibelula nxa besenza umsebenzi wabo. Bathe ngabe abakhokheli bayasukumela phezulu balonde ukulandelwa kwesisekelo somthetho welizwe mayelana ngamalungelo abantwana okufunda.
Support CITE’s fearless, independent journalism. Your donation helps us amplify community voices, fight misinformation, and hold power to account. Help keep the truth alive. Donate today