Umlobi ngu Michelle Dube
Izakhamizi zeStanmore eGwanda sezamukele ngenjabulo ukwakhiwa kwesakhiwo esitsha seposo (post office) esizanceda ikakhulu abadala abathola imali yomhlalaphansi.
Isakhiwo lesi esesiphelile ukwakhiwa sesilindelwe ukuvulwa ngokusemthethweni.
Omunye wezakhamizi ezithola imali yomhlalaphansi u Genesis Ncube uthe lesi sakhiwo sizenza kube lula ukuthola imali eduze.
“Kuyangijabulisa ukubona into inhle eyenzwe lapha ngoba kunceda thina ikakhulu . Bengithwala nzima ngomango engiwuhamba ngisiya gada ukuyathatha imali edolobheni, lokugada izimota ngapho imali ingekho, iphelela ekuthengeni amaphilisi,” kutsho uNcube.
Omunye wezakhamizi njalo u Obert Ndlovu uthe isakhiwo lesi bayasemukela ngoba bebesengozini yokutshontshelwa imali yizigebenga.
“Besihamba sisesaba, silovalo lokuthathelwa imali ngamasela, kuhle kakhulu okwenziwe lapha.”
UEva Sibanda yena uthe njengabantu abadala bekusenzaka ukuthi bekhohlwe izithupha besiyathatha imali obekusenza ukuthi bephindele emakhaya bengatholanga imali.
“Ngiyambonga uhulumende ngalokhu akwenzileyo ngoba besithwele nzima ngokutshona sikhohlwe izithupha okuyabe sekusenza ukuthi sibuyele ekhaya kumbe sekudinga ukuthi ufonele omunye umuntu ukuthi akulandele, sekumele umgadise, ikanti nxa kulapha eduze ngiyabuyela lobanini kungakavalwa,” kutsho uSibanda.
USobhuku uMillion Dube uthe lesisakhiwo sizasiza njalo labo abayabe bethunyelwe imali ezivela kwenzinye indawo.
“Kuzabe kulobulembu (internet) okuzancedisa abantwana besikolo ikakhulu labo ababhala imihloliso ukuthi bedinge amaphepha kanye lokungezelela ulwazi,” kutsho u Dube.
UDube uthe sekulindelwe ukuthi kwakhiwe izindlu zezisebenzi eziyabe zisebenza kulesisakhiwo, kufakwe kanye lamanzi.
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.