Umlobi ngu Nancy Phiri
Izakhamizi ze Stanmore sezibonge inhlanganiso ye World Vision encedise ngokwakhela abantwana abangamankazana izambuzi esikolo se Stanmore Primary School ukuze benelise ukuhlala behlanzekile lapho besesikhathini.
Kunanzelelwe ukuthi abantwana abangamankazana bebesiba lohlupho lokuzinakekela ngesikhathi besesikhathini.
Ezambuzini lezi kutholakala amanzi lamasepa okugeza izandla lezibuko, njalo amankazana afundiswa ngokuhlanzeka .
Izakhamizi zijabule kakhulu ngokuthi abantwana bakhelwe lezi zambuzi .
“Lezi zambuzi zenze kwaba lotshintsho kakhulu,”kutsho u Soneni Nkiwane, umzali.
UNkiwane uthe abantwana abasakhathazeki ngokuthi balahlele ngaphi ingcekeza kumbe besabe ukuhlekwa ngabanye nxa besebenzisa izambuzi.
Ugcizelele wathi bakhangelele ukubona abantwana bethuthuka njalo beqhubeka befundiswa ngokuhlanzeka.
Omunye wabafundi eSikolo uthe bafundiswa ngokuthi beziphathe njani lokuthi behlale behlanzekile.
“Siyazithanda lezi zambuzi ngoba ziyasinceda njalo sihlala sihlanzekile ngoba siyazibuka esibukweni,” kutsho umfundi.
UKhansela wendawo u Nokuthula Moyo uthe izambuzi lezi ziluncedo kakhulu emankazaneni ngoba nxa sebethe bazingcolisa balakho ukugeza.
“Kuqala abanye abantwana bebethi nxa besesikhathini bengayi esikolo besesaba ukuthi bazazingcolisa. Lezi zambuzi zibalungele sibili abantwana besikolo,” kutsho uMoyo.
Ngesikhathi izambuzi lezi zisakhiwa, izakhamizi zaphatheka kulomsebenzi ngokuthwala amanzi letshebetshebe.
USobhuku u Million Dube uthe izakhamizi zizasebenza ndawonye ukuze izambuzi lezi zihlale zihlanzekile njalo zihlale zinceda abantwana.
“Sibonga iWorld Vision ngokusakhela lezizambuzi njalo sikhangelele ukubona abantwana behlala behlanzekile,” kutsho u Dube.
Esinye sezakhamizi uMaNdlovu uthe bebenanzelela ukuthi abantwana bebengayi esikolo nxa besesikhathini.
“Ngibona iWorld Vision yabona kufanele ukuthi kube lezambuzi lezi ngoba kwenza abantwana bathakazelele ukuya esikolo, kuphinda kuthokozise lathi abazali,” kutsho uMandlovu.
“Ngalezi zambuzi sikhangelele ukubona abantwana bethakazelela ukuya esikolo njalo bephumelela ezifundweni zabo bengela kwesaba lokucabanga.”
This story was produced as part of the CITE Youth Network training program, which aims to empower young women in rural communities with digital skills, enhancing their ability to create and share community news.