Umlobi ngu Talent Mbangeni
Izakhamizi ze Mananwa kuward 17 sezikhalaze ngodubo lwamanzi abahlangana lalo oselubangele ukuthi bathenge amanzi ngentengo ephezulu kanye lokumiswa kwenhlelo ezithile esigabeni.
Abantu sebahamba imango emide bedinga amanzi ikanti izivande sezitshile ngenxa yokuswelakala kwamanzi.
Izifudlana eziseduze lemizi kubikwa sezitshile.
Omunye wezakhamizi, uSikhulile Ndlovu osebenza eManama Business Centre ubike ukuthi akasakwazi ukuthi amanzi acina nini ukubakhona.
“EManama yigrowth point engelamanzi, asikwazi ukuthi amanzi aphela nini, le ZINWA ayisiniki impendulo, sibona imota zibuya zibuyela akulanto esiyitshelwayo.
“Ukuze sithole amanzi siyaqhatsha abantu abahamba ngenqola bayesikhela. Asikwazi ukuthi ngendlela abakha ngayo imgodi yakhona ingabe inhlanzekile yini.”
UNdlovu uthe ekutholeni kwabo amanzi lawa bawanatha enjalo engabiliswanga.
“Kunzima lokusebenzisa izambuzi ngoba endaweni yethu kusetshenziswa izambuzi ezisebenzisa amanzi ngakho sekuhlala kulengcekeza ngenxa yokuswelakala kwamanzi.”
Ugcizelele ukuthi manzi bawathenga ngamarandi amahlanu (R5).
“Ngelanga silakho ukuthenga ngamarandi angamatshumi amahlanu (R50), ensukwini ezimbili ayabe esephelile.”
UNokuthula Moyo womunye wezakhumuzi ezivelela kuward 16 ubike ukuthi ukuswelakala kwamanzi sekubabisele emuva emisebenzini yezandla efana lezivande abaphatheke kuyo njengabomama.
“Thina uhlupho lwamanzi silalo sibili kunje sehluleka lokuthola imali ukuthi sitshayelane imali njengabo mama ngoba bengithola imali leyi esivandeni pho ke njengoba sekutshile ngenxa yokuswelakala kwamanzi, sekunzima.”
Ugcizelele ngokuthi usesehluleka ukufundisa abantwana kanye lokwenza imisebenzi yakhe.
“Sikesazama ukuthi sihlangane singabomama sizama ukuthi sitshonise lapho esithola khona amanzi manje amanzi esiwatholileyo ngawokuthi sikwanise ukuthi sinathe kuphela, awokuthi sithelele isivande kwehlule ngakho asazi ukuthi singasizakala njani.
