Umlobi ngu Alliah Sibandaย
Omunye wezakhamizi ezivelela kuvillage 7, eStezi, u Adson Nkala kubikwa eselahlekelwe zinkomo ezingamatshumi amabili lanhlanu ngenxa yesomiso esesibangele indlala, lokuswelakala kwamanzi esigabeni se Matabeleland South.
Isigaba sokulima lonyaka eZimbabwe besingasihle emva kokuthi izulu belilincane, okubangele izakhamazi kuzigaba ezihlukeneyo elizweni ukuthi ziswele ukudla kanye lamanzi.
UMongameli welizwe uEmmerson Mnangagwa wazisa ukuba indlala ebangelwe yisomiso se El Nino, kumele iqakatshekiswe njalo imqoka enhlelweni zonke Zika hulumende.
Umnunzana uNkala ubike ukuthi inkomo zakhe ziqala ukufa ubelokubala inani waze wacina eswela amandla okuzibala.
Utshele intatheli njalo ukuthi inkomo zakhe bezingabulawa yikuswelakala kokudla ngoba ubesenelisa ukuthenga kodwa zibangelwe yikuswelakala kwamanzi.
“Ezinye bezibanjelwa edamu ngizithole khona sezifile.”
Ubike njalo ukuthi inkomo zakhe zife ngendlela eyisihluku.
” Ngizizwa ngimadolo nzima njalo ngiphelelwa ngamandla ngendlela engiphelelwe ngayo zinkomo,zife ngendlela ebuhlungu akade ngingayilindelanga. Inani elifileyo lingadlula amatshumi amabili lanhlanu.”
USobhuku wesigaba, uPromise Tshabangu ubike ukuthi njengesigaba sebezamile imizamo ukuze isigaba sibe lamanzi.
“Ikhona imizamo esiyenziwe endaweni yeMakwilila Dam, sekugejwe umgodi kwadingwa lezinjini kwezinye izakhamuzi eziseduze lakuleyo ndawo ezokuthi kudonswe amanzi ezifuyo ukuthi zinathe, njalo sesivumelane ukuthi sikhiphe imadlana engange R30 ukuze sithenge amafutha okudonsisa amanzi.”
